ប្រសាសន៍ ឯកឧត្តម ផាន់ ណាឌី អគ្គនាយកនៃអាជ្ញាធរជាតិសំបូរព្រៃគុក

    រមណីយដ្ឋានប្រាសាទសំបូរព្រៃគុក គឺជាអតីតរាជធានីឦសានបុរៈ នៃអាណាចក្រចេនឡាក្នុង​ចន្លោះ​ចុង​សតវត្សទី៦ ដើមសតវត្សទី៧នៃគ្រឹស្តសករាជ។

សំណល់បុរាណជាច្រើននៅក្នុងរាជធានីឦសានបុរៈ គឺស្ថិតក្នុងរមណីយដ្ឋាន ប្រាសាទ សំបូរព្រៃគុក​សព្វថ្ងៃ​មាន​ជាអាទិ៍៖ ប្រាសាទឥដ្ឋ សិលាចារឹក សំណង់រក្សាទឹក កំពែងក្រុង និងទីសក្ការៈបូជាដទៃទៀត។ សំណង់​​​ទាំង​នោះ បានឆ្លុះបញ្ចាំងអំពីដំណាក់កាលនៃ ការរីកចម្រើនរបស់អារ្យធម៌ខ្មែរនាសម័យនោះ។ រមណីយ​ដ្ឋាននេះ បានស្ថាបនាឡើង​ជាបន្ត​បន្ទាប់​អស់​រយៈពេល​ប្រហែល៥០០ឆ្នាំ ដែល​រំលេច​ឲ្យឃើញតួប្រាសាទ បដិមា និងស្នាដៃសិល្បៈ ជាច្រើនស្ថិតនៅកណ្តាល​ព្រៃ។

        តាមលក្ខណៈស្ថាបត្យកម្មនៃក្រុមប្រាសាទទាំងនោះ សំបូរព្រៃគុកមានវឌ្ឍនភាព ឡើងក្នុងរាជព្រះ​បាទ​ ឦសា​ន​​វរ្ម័នទី១ ដែលជាព្រះរាជបុត្ររបស់ចិត្រាសេន។ ក្នុងរាជ្យរបស់ ព្រះអង្គ សំណង់សាសនាជា​ច្រើន​ត្រូវ​បាន​ស្ថាបនា​ឡើងដែលជាស្នាដៃឯកដ៏វិចិត្រនៃ សិល្បៈខ្មែរសម័យមុនអង្គរ​រួមមាន៖ ចម្លាក់​ក្រឡោត​​លើឥដ្ឋ តួប្រាសាទឥដ្ឋរាង៨ជ្រុង ចម្លាក់លើកំបោរបាយអរ និងចម្លាក់ក្រឡោត​ក្នុងក្បាច់​មេដាយ។ វិសាល​ភាព​នៃសំណង់រក្សា ទឹក ជាភស្តុតាងបន្ថែមទៀតដែលបង្ហាញពីសារសំខាន់​របស់​រាជធានី និង​ពីសមិទ្ធផល​បច្ចេកវិទ្យា​របស់ស្ថាបត្យករ និងវិស្វករនាសម័យនោះ។

នាសម័យសង្គ្រាម រមណីយដ្ឋានសំបូរព្រៃគុកបានទទួលរងការខូចខាតដោយការវាយប្រយុទ្ធ និង​កង្វះ​ការ​ថែទាំ។ រហូតដល់ឆ្នាំ១៩៩២ រាជរដ្ឋាភិបាលបានគ្រប់គ្រងតំបន់នេះឡើងវិញ បន្ទាប់មកក្រសួង​វប្បធម៌ និង​វិចិត្រ​សិល្បៈ ព្រមទាំងក្រសួង និងស្ថាប័នពាក់ព័ន្ធដទៃទៀត បានចាប់ផ្តើមគិតគូរ សិក្សា និង​អភិរក្ស​រមណីយដ្ឋាន​ប្រាសាទ​​សំបូរព្រៃគុកឡើងវិញ។ បច្ចុប្បន្ន តួប្រាសាទ​ទាំងឡាយ ទេសភាពវប្បធម៌ និងទេសភាព​ធម្មជាតិ​នៅក្នុងតំបន់រមណីដ្ឋានដ៏ធំទូលាយនេះ កំពុងបើកទ្វារ​ទទួលភ្ញៀវទេសចរ និងអ្នក​ឯកទេស​នានា​ចូល​ទស្សនា និងធ្វើការសិក្សាស្រាវជ្រាវទាំងប្រវត្តិសាស្រ្ត វប្បធម៌ និងជំនឿសាសនា។

ការបង្កើតគេហទំព័រអាជ្ញាធរជាតិសំបូរព្រៃគុក  http://samborpreikuk.gov.kh ដែលជាគ្រឹះស្ថានសាធារណរដ្ឋបាល ស្ថិតក្រោមអាណាព្យាបាលបច្ចេកទេស របស់ក្រសួងវប្បធម៌និងវិចិត្រសិល្បៈ និងអាព្យាបាលហិរញ្ញវត្ថុ របស់ក្រសួងសេដ្ឋកិច្ច និងហិរញ្ញវត្ថុ ក្នុងគោលដៅផ្សេព្វផ្សាយ និងចែករំលែក ពីសកម្មភាពការងាររបស់អាជ្ញាធរ ក៏ដូចបទដ្ឋានផ្សេង ដើម្បីជូនបងប្អូន សាធារណជូនស្វែងយល់ពីដំណើរការអភិរក្ស និងការគ្រប់គ្រង ក៏ដូចជាការអភិវឌ្ឍន៍ក្នុងតំបន់រមណីយដ្ឋានសំបូរព្រៃគុកទាំងមូល។

ទន្ទឹមនោះ​ ​ខ្ញុំ​ក៏សង្ឃឹម​ដែរ​ថា​រាល់​ចំណុច​ខុស​ឆ្គង ​ខ្វះខាតនឹង​ត្រូវ​បាន​បំពេញ និង​ទទួល​បាន​ការ​កែលម្អ​ដោយ​ស្ថាបនា​ពី​បងប្អូនសារធារណជន។